Tempo estimado de lectura: 3 min
Algúns alimentos e bebidas achegan un alto contido en azucres. O seu consumo excesivo é prexudicial para a saúde. Os azucres son moléculas sinxelas de hidratos de carbono que pasan rapidamente ao sangue. Atopámolos de xeito natural no leite e na froita, e tamén engadidos nalgúns alimentos durante o procesamento industrial.
Os cereais integrais, as verduras, os legumes e as froitas son as fontes máis apropiadas de hidratos de carbono da dieta. Achegan un alto contido en fibra dietética, un menor índice e carga glicémica e unha maior achega de vitaminas e minerais. As froitas e os produtos lácteos son unha boa fonte de vitaminas, minerais e fibra.
Pola contra, os alimentos con moitos azucres engadidos achegan con frecuencia moi pouco ou ningún beneficio nutricional. As bebidas refrescantes, os zumes industriais, as sobremesas lácteas, algúns produtos de panadería e as cremas para untar na merenda, constitúen as fontes principais de azucres entre a xente nova.
Algúns alimentos como, por exemplo, o chocolate poden levar azucres presentes de forma natural (lactosa do leite) e azucres engadidos no xarope de chocolate despois do seu procesamento industrial.
Lembra que:
A Organización Mundial da Saúde (OMS) recomenda que adultos e nenos reduzan o consumo diario de azucres. Recordade que a achega de enerxía procedente dos azucres non debe pasar dun 10% do valor calórico total diario e, se é dun 5%, moito mellor! Para unha achega calórica de 2000 kcal/día, isto suporía 25-50g diarios (5%-10%, respectivamente).
A Asociación Americana para o Corazón identificou recentemente un límite superior de 25g de achega diaria de azucre para todos os rapaces, independentemente da súa achega calórica diaria recomendada.
Aconsellou tamén evitar os azucres nos menores de dous anos, excepto os contidos de forma natural no leite e na froita.
Para evitar un consumo excesivo de azucre nos rapaces, seguide estes consellos:
Ofrecédelles auga cando teñan sede. Recordade que moitas bebidas refrescantes adoitan conter unha cantidade elevada de azucres, ás veces ata un valor similar a oito terróns.
Consumide as pezas de froita enteiras con máis frecuencia ca os zumes coados. A fibra pode “quedar” no espremedor ou no filtro. Un vaso grande de zume leva mais dunha peza de froita, por iso a cantidade de azucres é maior que se tomamos a peza enteira. Polo tanto deberemos alternar, e preferir, o consumo da froita enteira fronte ao zume natural.
Os batidos e os zumes comerciais non están incluídos na recomendación de 3 pezas de froita ao día!.