Tempo estimado de lectura: 3 min 30 sg
A preeclampsia é unha complicación do embarazo que, aínda que adoita ser leve na maioría dos casos, se non se trata, pode causar problemas graves de saúde para a nai e o seu bebé. Por iso son tan importantes os controis durante a xestación.
Que é a preeclampsia?
A preeclampsia é unha enfermidade que poden ter algunhas mulleres xestantes despois da semana 20 de embarazo e que principalmente se caracteriza por ter unha tensión arterial elevada e presenza de proteínas na urina.
Como sei se teño a tensión arterial alta?
Considérase que tes hipertensión cando en distintas medicións da túa tensión arterial se dá un destes dous casos:
- A tensión arterial máxima (sistólica) é superior a 140 e a mínima (diastólica) é maior que 90.
- A tensión arterial máxima (sistólica) é superior a 140 ou a mínima (diastólica) é maior que 90.
Por que teño hipertensión?
- Porque xa eras hipertensa antes de quedar embarazada.
- Porque o embarazo che induce tensión arterial alta, sen presenza de proteínas na túa urina.
- Porque tes preeclampsia, é dicir, tensión arterial alta e proteínas na túa urina.
Como previr a preeclampsia?
No teu primeiro trimestre de embarazo, o teu obstetra pode determinar que tes un risco de preeclampsia. Se é así, poida que che receite algún fármaco de maneira preventiva. O factor de risco máis importante é o antecedente de preeclampsia.
Que riscos ten?
- A preeclampsia afecta á placenta, o fígado, os riles, o sistema nervioso central e o sistema cardiovascular.
- A preeclampsia pode ter repercusións moi graves como a eclampsia, que é unha enfermidade durante o embarazo ou o puerperio que provoca convulsións seguidas dun estado de coma.
Cal é o tratamento?
O tratamento dependerá da gravidade da preeclampsia, da semana de embarazo en que esteas e, sobre todo, do estado de saúde teu e do teu bebé. Confía no teu obstetra e matrona e pregúntalles todas as dúbidas que teñas.
Acode ao hospital se es hipertensa e...
Tes dor de cabeza intensa
Tes dor abdominal intensa na boca do estómago
Sofres cambios visuais (visión de luciñas, perda temporal da vista…)
Náuseas ou vómitos
Mareo
Falta de aire grave
Edema que aparece moi rápido en todo o corpo (os edemas no embarazo son normais, sobre todo nas pernas)
Medición de tensión arterial descompensada en domicilio
Sabes medir a tensión?
Pide consello na túa farmacia de confianza antes de adquirir un aparello de medición.
Senta e permanece en repouso durante 10 minutos.
Ten os pés apoiados no chan, descruzados, e o brazo á altura do corazón. Coloca o brazalete e segue as instrucións.
A primeira vez, faino nos dous brazos. Se os resultados son parecidos, toma o dereito como referencia.