O pasado día 23 de setembro comezou a campaña de vacinación anual da gripe en Galicia, que se desenvolverá ata o 31 de decembro de 2024. Como en campañas anteriores, levarase a cabo en diferentes puntos de vacinación e comezarase polas persoas en residencias de maiores e persoas en centros de discapacidade, que serán vacinadas no seu contorno, por equipos específicos.

Mediante SMS serán citadas proactivamente as persoas maiores de 80 anos para vacinarse fronte a gripe e a COVID-19, para o que se habilitarán grandes recintos nas áreas sanitarias así como os servizos de atención primaria. A vacina tamén está indicada en mulleres embarazadas en calquera trimestre de xestación, as persoas fumadoras e o persoal de centros de educación infantil, entre outros.  Este ano, como novidade, introdúcese a vacina intranasal para nenos e nenas de entre 24 e 59 meses.

Nesta campaña temos un reto importante: conseguir unha cobertura vacinal nos traballadores sanitarios do SERGAS e traballadores sociosanitarios superior ao 75 %. Durante a campaña do 2023, obtívose un 56,85% nos traballadores sanitarios do SERGAS. Este ano os profesionais poderán vacinarse no seu centro de traballo fronte a gripe e covid-19 a partir do 14 de outubro de 2024.

 

Obxectivos específicos (vacinación antigripal)

• Acadar unha cobertura na poboación de 65 ou máis anos igual ou superior ao 75%.
• Acadar unha cobertura vacinal nos traballadores sanitarios do Servizo Galego de Saúde e traballadores sociosanitarios superior ao 75%.
• Acadar unha cobertura vacinal nas mulleres embarazadas e persoas con condicións de risco superior ao 60%.
• Acadar unha cobertura vacinal nos nenos e nenas de entre 6 meses e 59 meses do 60%.

 

POBOACIÓN DIANA PARA A VACINACIÓN FRONTE Á GRIPE

• Persoas de 60 ou máis anos
• Residentes en institucións pechadas (residencias de persoas maiores e centros de discapacidade)
• Mulleres embarazadas en calquera trimestre da xestación e puérperas nos 6 primeiros meses tras o parto, se non foron vacinadas anteriormente
• Persoas de 12 a 60 anos con condicións de risco (definidas no apartado 1)
• Poboación infantil de entre 6-59 meses de idade
• Menores de entre 5 e 12 anos con condicións de risco (Apartado 2)
• Persoas de 5 a 18 anos de idade que reciben tratamentos prolongados con ácido acetilsalicílico
• Persoas fumadoras
• Persoas con enfermidade celíaca
• Persoas con fístula de líquido cefalorraquídeo e implante coclear ou espera deste
• Conviventes de persoas pertencentes a grupos de alto risco
• Persoas que traballan en servizos públicos esenciais, con especial énfase nos seguintes: 

  - Forzas e corpos de seguridade do Estado, con dependencia nacional, autonómica ou local

  - Bombeiros

  - Servizos de protección civil

  - Persoal de centros sanitarios e sociosanitarios públicos e privados (tanto sanitarios como non sanitarios): coidadores domiciliarios, persoal de oficinas de farmacia e persoal que traballa nos servizos de emerxencias sanitarias

• Profesionais ou estudantes en prácticas de centros sanitarios, servizos e establecementos sanitarios e sociosanitarios
• Persoal de centros de educación infantil nos cursos de nenos e nenas menores de 5 anos
• Persoas con exposición laboral directa a animais ou ás súas secrecións en granxas ou explotacións avícolas, porcinas ou de visóns ou a fauna silvestre (aves, xabarís ou mustélidos), como gandeiros, veterinarios, traballadores de granxas, cazadores, ornitólogos, axentes de medio ambiente, persoal de zoolóxicos, etc

 

Apartado 1: persoas de entre 12 e 60 anos con condicións de risco:

• Diabetes mellitus e síndrome de Cushing
• Obesidade mórbida (IMC ≥40 en adultos, ≥35 en adolescentes ou ≥3 DS na infancia)
• Enfermidades crónicas cardiovasculares, neurolóxicas ou respiratorias, incluíndo displasia broncopulmonar, fibrose quística e asma
• Enfermidade renal crónica e síndrome nefrótica
• Hemoglobinopatías e anemias ou hemofilia, outros trastornos da coagulación e trastornos hemorráxicos crónicos, así como receptores de hemoderivados e transfusións múltiples
• Asplenia ou disfunción esplénica grave
• Enfermidade hepática crónica, incluíndo alcoholismo crónico
• Enfermidades neuromusculares graves
• Inmunosupresión (incluíndo as inmunodeficiencias primarias e a orixinada pola infección por VIH, por fármacos, así como nos receptores de transplantes e déficit de complemento. En pacientes con antecedentes de transplante de proxenitores hematopoéticos, no caso de administrar unha dose antes do sexto mes postransplante, recoméndase administrar unha segunda dose ás 4 semanas. En pacientes con antecedente de transplante de órgano sólido, recoméndase só unha dose anualmente
• Cancro e hemopatías malignas
• Enfermidade inflamatoria crónica
• Trastornos e enfermidades que supoñan disfunción cognitiva: Síndrome de Down, demencias e outras

Apartado 2: nenas e nenos de entre 5 e 12 anos con condicións de risco:

As citadas no Apartado 1

Vacinándote fronte á gripe e a COVID-19 protéxeste ti, aos teus pacientes e a túa familia. Anímate e arrima o ombro.