Tempo estimado de lectura: 6 min 30 sg
Normas para conservar alimentos na despensa.
Non todos os alimentos necesitan refrixeración para gardalos dun xeito seguro. Unha despensa, por baixo dos 25 °C, é o lugar máis axeitado para gardar o pan, os alimentos secos, as conservas, o leite UHT e as bebidas. Ademais, a despensa é tamén o lugar ideal para gardar algunhas froitas e verduras como:
As bananas e os plátanos, sensibles ao frío e que non se deben gardar na neveira.
As que requiran maduración como tomates, aguacates ou froitas con carabuña.
As patacas e as cebolas, que se deberán dispor nun lugar escuro para evitar que xermolen.
Para todos os casos anteriores deberedes cumprir certas normas:
Dispoñede os alimentos separados do chan, evitando a humidade, a sucidade e a calor.
Revisade con frecuencia os alimentos frescos como os plátanos, as laranxas e o queixo. Se tedes algún estragado, con fungos, deberedes retiralo, lavar o recipiente que o contiña, secalo ben e logo volver a colocar os alimentos que queirades preservar, p. ex., as outras pezas de froita.
Situade á vista das nenas e dos nenos aqueles alimentos que queiramos promover, como as froitas, o leite…, deixade “ocultos” outras bebidas e alimentos dos que “non nos interese” a súa visibilidade.
Utilizade un armario diferente para os artigos de limpeza co fin de evitar posibles accidentes.
A conxelación
É un bo método de conservación, preferible fronte a outros como a salgadura ou o afumado. Mantede o conxelador a unha temperatura de -18 ºC e lembrade seguir estas normas básicas:
Respectade as indicacións do fabricante para situar os produtos no interior do aparato e evitar un tempo de conxelación excesivo. Usade envases apropiados. Co vidro, acertamos sempre!
Desconxelade os produtos gradualmente. Na véspera, pasade os alimentos do conxelador ao refrixerador. Aínda así, comprobade que xa estean completamente desconxelados antes de cociñalos. Non desconxeledes nunca a temperatura ambente!
Non volvades a conxelar alimentos que xa foron conxelados previamente, salvo que se cociñen antes e unha vez arrefriados.
Mantede uniforme a temperatura do conxelador, sen introducir alimentos aínda quentes.
Podemos desconxelar no microondas, pero con este método poden quedar puntos “fríos” e “quentes” co risco de contaminación. Por isto, o mellor é cociñalo e consumilo inmediatamente.
Cando vaiades a desconxelar, o conxelador ten que estar libre de alimentos. No caso dun corte na electricidade é mellor deixar os alimentos dentro coa porta cerrada. Logo, se os alimentos están desconxelados, pero aínda fríos, pódense cociñar de forma inmediata. Se o corte foi moi longo, mellor non arriscar!
Normas para conservar alimentos no firgorífico
Deben conservarse todos os alimentos que inclúan a recomendación de: “Conservar refrixerado”, particularmente o leite pasteurizado, a carne ou as comidas preparadas. A temperatura por baixo dos 5 °C frea a proliferación de microorganismos. Algúns produtos que poden conservarse a temperatura ambiente, como o leite UHT e as conservas, deben refrixerarse unha vez abertos.
Os consellos seguintes son ben doados de seguir!
Aplicade a “norma das dúas horas”, como o tempo límite que deberá pasar dende que mercamos un alimento que necesita ser refrixerado ata que chega a neveira.
Usade recipientes apropiados para impedir que a comida se oxide ou se reseque. Gardade en recipientes de vidro ou nun recipiente adecuado tapando o contido restante das latas de conserva abertas.
Evitade mesturar os alimentos crus cos xa preparados para consumir. Situade as carnes, as aves e os peixes crus, xa limpos da “tripa” e “miúdos”, na zona máis axeitada para evitar pingar a outros que xa estean preparados para o seu consumo, cun posible risco de contaminación.
Arrefriade ben os alimentos cociñados antes de gardalos. Se os introducimos un pouquiño quentes, modificaremos a temperatura do interior do frigorífico.
Mantede pechada a porta do frigorífico o máximo tempo posible, para acadar unha temperatura óptima no seu interior. Evitade encher a neveira excesivamente. Deixade espazo entre os produtos, para que o aire poida circular e a neveira funcione de xeito eficiente.
Non lavedes os ovos ata o momento do consumo inmediato. A casca sérvelles de envoltura protectora e se a mollamos perden a dita protección.
Consumide en primeiro lugar os alimentos que levan máis tempo almacenados a partir da data de consumo preferente e de caducidade.
Rexeitade os alimentos cun olor, cunha textura ou cunha cor que non correspondan coas súas características habituais.
Para conservar e darlle sabor a alimentos como as carnes e os peixes, unha boa idea é engadir un chorriño de aceite, allo e perexil mentres estean na neveira.
Lembrade que os microorganismos poden proliferar a temperaturas baixas, aínda que dun xeito máis lento. Por isto, deberase recoller calquera vertedura inmediatamente, e limpar ben a zona.
Seguide sempre as normas de almacenado, segundo indique o fabricante.
