​ 

Involucrar aos nenos e nenas na preparación das comidas é unha excelente idea para ensinarlles como manter unha dieta equilibrada dende idade temperá. A primeira lección de alimentación saudable consiste en aprender a seleccionar e preparar os alimentos de maneira axeitada. Fagamos desta unha actividade familiar divertida! Antes de comezar, ten en conta estes consellos:

Antes de cociñar

• Recolle o cabelo e usa roupa axeitada para evitar accidentes mentres cociñas.
• Limpa e organiza o teu espazo de traballo. Mantén a superficie de traballo limpa e desinfectada, e lava e seca a táboa de cortar cada vez que prepares diferentes tipos de alimentos, especialmente carne, polo ou peixe.
• Lava as mans con frecuencia. Antes de comezar, asegúrate de eliminar os restos de xabón ou deterxente.

 

Pasos para involucrar aos nenos na cociña

• Deixa que axuden na planificación e elaboración das comidas. Isto fomenta a súa creatividade e compromiso.
• Permítelles ulir e manipular alimentos. Así aprenden sobre texturas e cheiros, sempre repasando as normas básicas de hixiene.
• Asigna tarefas segundo a súa idade. Por exemplo, poden decorar pratos, aderezar ensaladas ou mesturar ingredientes.
• Prioriza a seguridade. Supervisa o uso de elementos perigosos como coitelos, aceite quente e enchufes eléctricos. Establece unha zona segura arredor da cociña.
• Converte o proceso nun xogo. Probade os pratos que preparastes entre todos ou creade diferentes aliños para un mesmo alimento, como ensaladas con salsas de iogur, cítricos ou herbas.
• Invítalles a participar en tarefas adicionais. Pór e retirar a mesa, secar pratos ou gardar utensilios tamén son formas de colaborar.

 

Consellos para unha alimentación saudable

• Comeza con receitas sinxelas. Isto axudará aos nenos a acostumarse pouco a pouco a diferentes sabores.
• Mantén o sabor orixinal dos alimentos. Acostuma aos pequenos a consumir alimentos baixos en sal e azucre dende a infancia, evitando o uso excesivo de salsas comerciais. A froita, os zumes naturais e os lácteos xa conteñen azucres naturais, polo que non é necesario engadir máis.
• Opta por alimentos frescos e de tempada. Estes adoitan ser máis nutritivos e con menos azucres ou sales que os produtos procesados.

Preparación segura dos alimentos: recomendacións da OMS