O pasado 12 de xaneiro, a Dirección Xeral de Saúde Pública presentou a plataforma
Sanidade Mediaverso na Cidade da Cultura, en Santiago de Compostela. Ao acto
acudiron representantes da Consellería de Sanidade, personalidades das diferentes
administracións, así como persoal técnico e colaboradores clave que contribuíron no
desenvolvemento deste proxecto integral.
Trátase dunha plataforma multitecnolóxica que utiliza as novas tecnoloxías para
promover un estilo de vida saudable e que se estrutura ao redor de catro grandes eixos:
a alimentación saudable, a actividade física, o coidado do benestar emocional e a
prevención de condutas aditivas.
Seguindo os obxectivos do Plan Obesidade Zero, Sanidade Mediaverso nace co fin de
consolidar a intención de promocionar hábitos de vida saudables na poboación e de
prover, coas novas tecnoloxías, formación e ferramentas de educación para a saúde
relacionadas coa alimentación, o exercicio físico, o benestar emocional e a prevención
de condutas aditivas.
O contido web de Sanidade Mediaverso inclúe unha serie de vídeos instrutivos con
expertos en actividade física, nutrición e benestar emocional que proporcionan
consellos prácticos e de utilidade relacionados con estes aspectos. Ademais, esta
plataforma inclúe diversos cursos de formación e recursos enfocados na prevención de
condutas aditivas, con fin de integrar hábitos saudables na vida diaria das persoas.
En canto a ferramentas dixitais, Sanidade Mediaverso incorpora un planificador de
comidas para 8 semanas con receitas saudables que permite elaborar a lista da compra
para todos os membros da unidade familiar.
Así mesmo, dentro da plataforma podemos atopar ferramentas interactivas de
realidade aumentada que fomentan a actividade física para todas as idades, xogos para
aprender as diferenzas entre os alimentos e as súas combinacións para conseguir unha
alimentación equilibrada ou unha aplicación que conta os pasos diarios e que permite
realizar as distintas etapas do Camiño de Santiago de forma virtual, entre outras.
Ademais, a plataforma tamén incorpora experiencias mediante o uso de realidade
virtual para a prevención de condutas aditivas en adolescentes e para incentivar o
exercicio físico entre as persoas maiores, adaptado ao estado de saúde.
En definitiva, Sanidade Mediaverso emprega ferramentas dixitais deseñadas para
motivar, educar e guiar ás persoas co fin de adoptar un estilo de vida saudable e
alcanzar o benestar integral.
Pode acceder a todo o contido de Sanidade Mediaverso na seguinte ligazón: https://sanidademediaverso.sergas.gal/