O vindeiro domingo 7 de abril celébrase o Día mundial da saúde. Este día ten como obxectivo principal sensibilizar sobre temas de saúde específicos e poñer en marcha acciones conxuntas para abordar desafíos que implican a toda a poboación. Como todos os anos, trátase dunha data sinalada na que se selecciona un tema para destacar unha área prioritaria de preocupación de saúde pública no mundo. O tema central deste ano é 'A miña saúde, o meu dereito', co fin de defender o acceso aos servizos sanitarios, á educación e á información.

Así mesmo, é un día que pretende concienciar en materia ambiental, poñendo en valor aspectos que inflúen directamente na saúde das persoas, como o acceso á auga potable e a preservación do aire limpo. De igual forma, o dereito á saúde ten en conta os determinantes sociais da saúde, contemplando unha serie de circunstancias da vida cotiá que xogan un papel relevante na saúde poboacional, como a vivenda, o traballo ou o conxunto de forzas e sistemas que inflúen sobre as condicións de vida das persoas.

Por outra banda, o 6 de abril celébrase o Día mundial da actividade física, que nos lembra o papel vital que xoga na promoción do benestar físico e mental. Estas dúas datas bríndannos unha oportunidade para reflexionar sobre a importancia de certas decisións sobre a nosa saúde e comprometernos cun estilo de vida máis activo e saudable. Por este motivo, aquí móstranse os niveis de actividade física que a OMS recomenda realizar a persoas de distintas idades.

Nenos e adolescentes de 5 a 17 anos

Recoméndase realizar, polo menos, 60 minutos diarios de actividade física de intensidade moderada a vigorosa. A actividade física de máis de 60 minutos diarios proporciona beneficios adicionais para a saúde. Recoméndase incluír actividades que fortalezan os músculos e os ósos, polo menos, 3 veces por semana.

Adultos de 18 a 64 anos

Recoméndase realizar, polo menos, 150 minutos de actividade física de intensidade moderada ao longo da semana ou realizar polo menos 75 minutos de actividade física de intensidade vigorosa, ou unha combinación equivalente de ambas. Para obter beneficios adicionais para a saúde, os adultos poden aumentar a súa actividade física de intensidade moderada a 300 minutos semanais, ou o seu equivalente. Ademais, é recomendable realizar actividades de fortalecemento muscular dos principais grupos musculares, 2 ou máis días á semana.

Adultos de 65 anos ou máis

Recoméndase realizar, polo menos, 150 minutos de actividade física de intensidade moderada ao longo da semana ou, polo menos, 75 minutos de actividade física de intensidade vigorosa ou unha combinación equivalente de ambas. Para obter beneficios adicionais para a saúde, pódese aumentar a actividade física de intensidade moderada a 300 minutos semanais.

Recoméndase que as persoas con mobilidade reducida realicen actividade física 3 ou máis días por semana para mellorar o equilibrio e previr as caídas. Ademais, é recomendable realizar actividades de fortalecemento muscular que impliquen aos principais grupos musculares, 2 ou máis días á semana.