Cociñamos!

 

Técnicas de cociñado.

Co tratamento térmico dos alimentos favorecemos a súa dixestibilidade e evitamos a contaminación. Pero se non o facemos correctamente, podemos perder nutrientes ou incorporar substancias tóxicas.

Consellos para cociñar correctamente:

 

• Coa técnica do fervido, procurade minorar as perdas nutricionais:
• Utilizando pouca cantidade de auga.
• Engadindo o alimento cando xa ferve o líquido.
• Cortando os vexetais en anacos grandes, sen pelar.
• Evitando o remollo.
• Lembrade que podedes utilizar a auga da cocción para outras preparacións como sopas, caldos e purés, sempre que se utilice antes de 24 horas e sexa conservada mentres tanto nun tarro de cristal.

• Coa cocción ao vapor consérvanse mellor algunhas vitaminas que se perden na auga da cocción. Por isto, é unha das técnicas máis recomendables para preparar as hortalizas e verduras.

 

• As preparacións ao forno son moi aconsellables dende o punto de vista nutricional, particularmente cando se inclúan na mesma receita o peixe, as patacas e as hortalizas como o tomate ou a cebola. Os sabores e as graxas saudables dos peixes mestúranse e enriquecen o prato, fano moi palatable ao gusto dos nenos e, polo xeral, adoitan ser menos calóricos que os fritos.

• Nos microondas as perdas de nutrientes son mínimas. Se cociñades carnes ou peixes, procurade que o interior do alimento se acade unha temperatura capaz de eliminar os microorganismos, pero deberedes seguir sempre as indicacións do fabricante. É un método apropiado para requentar as verduras.

 

• Os “salteados” e refritos adoitan preservar a calidade nutricional dos alimentos ao ser un tratamento moi curto. Para acompañar alimentos como arroz ou pasta, son moi recomendables os de tomates, pementos, allo e cebola; os de cogomelos con ovo batido etc. Particularmente como substitutos das salsas comerciais.

• O cociñado “á grella” pode xerar substancias tóxicas e canceríxenas, particularmente pola presenza do fume directo sobre os alimentos, as altas temperaturas ás que son sometidos e as graxas engadidas. É mellor non abusar!

 

• Os fritos aumentan o valor calórico dos alimentos. Por isto, aínda que sexan ben acollidos polos rapaces, non debemos abusar da súa frecuencia.

Lembrade!

• O aceite máis adecuado para fritir é o aceite de oliva, xa que tolera mellor as altas temperaturas que os de sementes. Contén unha maior cantidade de compostos antioxidantes e forma menos compostos de degradación.
• Deberase incluír o alimento cando se acade a temperatura axeitada (uns 180 ºC). O obxectivo é reducir o tempo de fritura e evitar así unha absorción excesiva de aceite. Ao introducir produtos conxelados, deberán incorporarse pouco a pouco para que non baixe excesivamente a temperatura.
• Procurade fritir con abundante aceite quente, cubrindo o alimento, pero sen queimalo.
• Ollo! coa costra requeimada e co pardeamento excesivo dalgúns alimentos ricos en carbohidratos despois de cociñalos. Pódense estar xerando substancias tóxicas para a saúde!
• Unha vez frito, o alimento deberase colocar sobre papel absorbente para eliminar o aceite sobrante.
• Lembrade non utilizar diferentes tipos de aceite ou graxas para unha mesma fritura.
• Coade sempre o aceite despois do seu uso. Aconsellamos reutilizalo para outras preparacións (guisos…) que non requiran temperaturas excesivas.
• Se o aceite ten unha cor escura despois do seu uso, non o utilicedes! Debedes recollelo nun recipiente e levalo ao contedor de recollida de aceite usado. Non o tiredes polo vertedoiro!